هي إيه قصة شقق الإسكان الاجتماعي 2025، وكم وحدة سكنية طرحتها الحكومة للمصريين في الطرح ده، والمساحات كام وفي أي محافظات وكمان التقديم بيتم إزاي، وامته بالظبط هيتم التسليم؟
في الفترة الأخيرة، الحكومة ممثلة في وزارة الإسكان، طرحت حوالي 400 ألف وحدة سكنية، وده حصل طبعا تنفيذا لتوجيهات الرئيس عبد الفتاح السيسي، بتوفير السكن الملائم للمواطنين منخفضي ومتوسطي الدخل.
ونقدر نقول، إن الخطوة دي بتستهدف تحقيق رؤية الدولة في توفير السكن الملائم والمناسب لكل المواطنين، وخاصة محدودي الدخل أو البسطاء.
ومن بين الوحدات دي، هيتم طرح حوالي 115 ألف وحدة سكنية ضمن المبادرة الرئاسية "سكن لكل المصريين" في عدد من المحافظات والمدن الجديدة على مستوى الجمهورية، وبيتم تنظيم الموضوع من خلال صندوق الإسكان الاجتماعى ودعم التمويل العقاري.
طب إيه هي خطوات التقديم على شقق الإسكان الاجتماع، والأوراق المطلوبة؟
بص يا سيدي، الوحدات المطروحة دي بتدرج ضمن مشروع "سكن لكل المصريين 7"، واللي أصلا بيتضمن مرحلتين من الطرح، المرحلة الأولى بتضم 15 ألف وحدة سكنية للمواطنين متوسطي الدخل، ويتم التخصيص بها بنظام أسبقية الحجز.
وبيبدأ التقديم عليها اعتبارًا من 21 مايو 2025 ولحد 4 يونيو 2025، وبعد كده بيتم فرز طلبات العملاء المتقدمين وتحديد المنطبق وغير المنطبق عليهم الشروط، وبعد فترة بيتم تلقي طلبات التظلم من المواطنين غير المنطبق عليهم الشروط.
وشوية، ويتم تحديد موقف كافة العملاء اللي هيتم إتاحة فترة بتصل ل 10 أيام، بيتم فيها دخول العميل المنطبق عليه الشروط على موقع إليكتروني مخصص لاختيار الشقة أو الوحدة السكنية بتاعته، علماً بأن بيتم إرسال رسائل نصية للعملاء المنطبق عليهم الشروط، وبيكون محدد فيها الموقع الإليكتروني الخاص بالحجز ومواعيد الحجز لكل مدينة.
ووفقا لوزارة الإسكان، فبتكون أولوية حجز الوحدات السكنية في الطرح ده، للعملاء من فئة متوسطي الدخل، اللي قدموا قبل كده في إعلانات الصندوق وماقدروش يسددوا قسطين أو أكتر من الأقساط ربع السنوية، واللي تم رفض طلباتهم، عشان كده هيتم إتاحة فترة لهم قبل باقي العملاء للدخول على الموقع الإلكتروني وحجز الوحدات السكنية.
أما بقى أماكن طرح المرحلة الأولى من سكن لكل المصريين 7، فهتكون في المدن الجديدة، وهي: حدائق العاصمة، وبدر، و6 أكتوبر، وحدائق أكتوبر، والعاشر من رمضان، و15 مايو، ورشيد، والعلمين الجديدة، وبني سويف الجديدة، والمنيا الجديدة، وناصر غرب أسيوط، وأسوان الجديدة.
وبخصوص المحافظات، فهتكون في: محافظات الدقهلية (جمصة)، ودمياط (شطا - تل وردة)، والبحر الأحمر (الغردقة)، والمنيا (مغاغة)، ومطروح، وده بمساحات بتتراوح بين 90 متر ب 127 متر.
أما الطرح التاني اللي أعلن عنه وزير الإسكان، فبيتضمن طرح 101 ألف وحدة سكنية (إسكان اجتماعي) لمنخفضي ومتوسطي الدخل ضمن عدد من وحدات الإسكان الأخضر.
وبيبدأ التقديم عليها، اعتبارًا من 8 يوليو 2025 ولحد 7 أغسطس 2025، بنظام التخصيص الإلكتروني العشوائي.
والطرح ده بيكون للعملاء السابق تقدمهم بإعلان "سكن لكل المصريين 5 " فقط، ممن هم خارج الأولوية أو غير منطبق عليهم الشروط، واللي قاموا بسحب مقدم جدية الحجز خلال المدة المحددة، ولكن بشرط انطباق محددات الإعلان على طلباتهم.
وفي حالة تقديم الطلبات، فبيتم فرز طلبات المتقدمين وتحديد المنطبق وغير المنطبق عليهم الشروط، وبعد فترة بيتم تحديد ميعاد إجراءات الاستلام.
أما مكان الشقق دي، فبتكون وحدات في مدن: اﻟﻌﺑور اﻟﺟديدة، واﻟﻌﺎﺷر من رمضان، وﺣداﺋﻖ اﻟﻌﺎﺻﻣﺔ، و15 مايو، وأخميم الجديدة، وأﺳوان اﻟﺟديدة، وأكتوبر الجديدة، والسادات، وبدر، وطيبة، وبرج العرب، وسوهاج الجديدة، وقنا الجديدة، والمنيا الجديدة.
كمان، الطرح ده بيتضمن وحدات سكنية بعدد من المراكز بمحافظات أسوان، وأسيوط، والأقصر، والجيزة، والفيوم، والمنيا، والمنوفية، وسوهاج، وقنا، ودمياط، والبحر الأحمر، والدقهلية، والوادي الجديد، ومطروح، والبحيرة، والمساحات بتكون ما بين 75 ل 90 متر.
نيجي بقى لمقدم جدية الحجز، فبيكون لمنخفضي الدخل 50 ألف جنيه و100 ألف جنيه لمتوسطي الدخل، وقريب هيتم إتاحة كراسة الشروط وتسجيل بيانات الحجز ورفع الاستمارة والإقرار من خلال موقع إليكتروني مخصص هتعلن عنه وزارة الإسكان قريب جدا، فلو حضرتك ناوي تحجز شقة العمر جهز نفسك كويس.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
