استبعاد زيزو من مباراة الزمالك وستيلينبوش فى الكونفدرالية

قرر مجلس إدارة نادى الزمالك، برئاسة حسين لبيب، استبعاد أحمد مصطفى زيزو، لاعب الفريق الكروى الأول بنادى الزمالك من قائمة الفريق التي ستخوض مباراة ستيلينبوش الجنوب إفريقي في الكونفدرالية.

وكتب إبراهيم فايق : «الزمالك يستبعد زيزو من قائمة مباراة الغد». 

وأصدر زيزو بيانا رسميًا حيث كتب عبر حساباته الرسمية على مواقع التواصل الاجتماعي: «الحمد لله أنا راجل بحترم كل الناس. لكن للأسف عدم ردي على المعلومات المغلوطة، والترامي الصمت زاد عن حده».

وأضاف : «كل ساعة خبر عن توقيع أو تجديد عقد زيزو. وكل واحد بيغازل الشريحة اللي عايزها من الجمهور. بسبب خبر رايح وخبر جاي. بكل وضوح أنا لم أوقع لأي نادي سواء داخل أو خارج مصر. اللي حصل على توقيعي يتفضل يعلن.. إذا كان كلامه صحيح؟ كمان اللي عنده دليل على توقيعي لأي نادي برضو يتفضل يطلعه على الملأ».

وأردف: «الناس لازم تعرف كويس انا بقدر جدا الكيان الكبير اللي أنا بلعب فيه..ولا يمكن أنكر فضله عليا. لكن فيه حاجة أنا مكنتش حابب أتكلم فيها خالص.. لأنه للأسف الأمور في الإعلام كلها في إتجاه واحد»

وتابع: «ليه محدش اتكلم عن حقوقي المشروعة زي أي لاعب في الدنيا.. ليه محدش اتكلم إن الناس سابتني بقالها شهور طويلة ومش عايزين يجددوا عقدي. ليه محدش اتكلم عن المستحقات المتأخرة اللي ليا بقالها كتير. ومش لاقي حد يجاوبني».

وأكمل: «ليه محدش اتكلم انه التجديد المرة دي جاي في مرحلة متقدمة من عمري بالنسبة للعيبة الكورة.. ولعيب الكورة مهما طول. عمره قصير في الملعب.. وأكيد كل واحد فيكم عنده أسرة. وعليه التزامات كتير.. محدش كمان اتكلم إنه ربنا سبحانه وتعالى أنعم عليا بعروض مقابلها المالي 5 أضعاف العرض اللي موجود».

وواصل : «ورغم كل ده. قلت وهفضل أقول أنا منتظر كلمة النادي. وده لإعتبارات كتير. مش لتجميل الصورة. والجماهير لازم تكون عارفة الحقيقة.. زيزو مش بيزايد.. ولا بيتاجر..لكن لازم الطرف التاني يكون عايزني أكمل.. وتكون فيه استجابة لربع المعروض عليا على الأقل..لكن للأسف الكلام معايا حاجة..واللي بيتقال للإعلام حاجة تانية..أنا مينفعش اجرح في حد. ولا أتكلم في حق حد.. لأن اللي بيتقال في الجلسات عيب يتقال برة..على الأقل من ناحيتي».

واختتم : «أنا مستني رد النادي لحد آخر يوم في الكونفدرالية..وأتمنى ربنا يكرمنا بيها أنا وزمايلي. وأي كلام هيتقال غير كدة في موضوع التجديد أو التوقيع قبل الموعد ده . هيكون كلام غير صحيح. ورسالتي الودية جدا للمسئولين في النادي اللي أنا بحترمهم جميعا..أتمنى الحوار في مسألة تجديد العقد يكون بيني وبينكم.. مش عن طريق الإعلام..وأنا كنت ولا زلت واضح معاكم في كل اللي اتكلمت فيه من أمور عادلة تساعدنا على اننا نكمل الطريق. شكرا على تفهمكم موقفي».