هو إيه اللي ممكن يخلي الأصول الأجنبية في بنوك مصر تقفز فجأة بنسبة 48% في مارس؟ .. وليه البنوك التجارية بقا عندها فجأة فائض بـ2.53 مليار دولار بعد ما كان في عجز؟ وهل إحنا فعلاً بنتحرك ناحية اقتصاد أقوى ولا ده مجرد فقاعة؟ لو عايز تفهم يعني إيه أصول أجنبية أصلاً وإزاي الحركة دي ممكن تفرق معانا كلنا.
خلينا نبدأ من الأول .. الأصول الأجنبية في البنوك دي يعني إيه؟
ببساطة .. دي كل الفلوس بالعملات الأجنبية زي الدولار واليورو اللي البنوك بتملكها .. سواء كانت ودائع من العملاء، أو فلوس جاية من تحويلات المصريين في الخارج أو حتى استثمارات أجنبية .. الفكرة إن الفلوس دي بتكون جاهزة عشان البنك يستخدمها لو احتاج يسدد التزاماته أو يغطي طلبات على العملة الأجنبية .. زي لما شركة عايزة تستورد بضاعة ومحتاجة دولارات مثلاً .. الأصول دي بتكون زي الدبابة الاحتياطية للبنك في أي أزمة.
و إيه اللي حصل في مارس للأصول الأجنبية فى البنوك؟
في مارس 2025 الأصول الأجنبية في القطاع المصرفي المصري – يعني البنك المركزي والبنوك التجارية مع بعض – قفزت بنسبة 47.7% .. يعني من 10.2 مليار دولار في فبراير وصلت لـ15 مليار دولار في مارس .. دي قفزة مش بسيطة خالص .. والأجمد من كده إن البنوك التجارية لوحدها، بعد ما كانت في عجز بـ1.92 مليار دولار في فبراير، بقت في فائض بـ2.53 مليار دولار .. ودي أول مرة من 8 شهور يحصل فيها الكلام ده .. من أغسطس 2024 يعني.
طيب إيه اللي خلّى التحول الكبير ده يحصل؟
فيه كام سبب قوي .. أول حاجة تدفقات النقد الأجنبي زادت بشكل كبير .. بفضل صفقة رأس الحكمة اللي لسه بتجيب فلوس كتير وكمان تحويلات المصريين في الخارج اللي قفزت بنسبة 42.6% في أول 9 شهور من 2024 .. ده غير إن إجراءات تحرير سعر الصرف في مارس 2024 ساعدت على استقرار السوق وخفضت الضغط على الدولار.
مش بس البنوك التجارية اللي عملت شغل .. البنك المركزي كمان كان له دور كبير .. فائض الأصول الأجنبية عنده زاد بنسبة 3.3% في مارس، ووصل لـ12.5 مليار دولار .. دي حاجة بتحصل للشهر الحادي عشر على التوالي .. يعني البنك المركزي بيبني احتياطي قوي من العملة الأجنبية، وده بيدي ثقة أكبر للمستثمرين والسوق.
وكتير من الخبراء بيقولوا إن السبب الرئيسي هو زيادة تدفقات الفلوس الأجنبية من مصادر زي السياحة والاستثمارات بالإضافة إلى تراجع الضغط على الدولار بعد تحرير سعر الصرف .. يعني السوق بقى أكتر استقرار والناس بقت واثقة إن الفلوس الأجنبية موجودة ومتوفرة.
طب الكلام ده حلو بس معناه إيه بالنسبة لينا كمواطنين؟
لما الأصول الأجنبية تزيد، ده معناه إن البنوك عندها سيولة أكتر بالعملات الأجنبية .. يعني لو شركة عايزة تستورد خامات أو ماكينات هتلاقي دولارات متوفرة .. كمان، ده بيقلل الضغط على الجنيه، وبالتالي بيساعد على استقرار الأسعار شوية .. ولو المستثمرين الأجانب شافوا إن البنوك قوية كده هيبقوا واثقين يجيبوا فلوسهم ويستثمروا في مصر .. وده بيخلّي الاقتصاد يتحرك لقدام.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
