من أسيوط للعلمين الجديدة ايه اللي بيحصل في قطاع البترول.. وايه حكاية المشروعات اللي بمليارات الدولارات.. وازاي الصعيد هيكتفي ذاتيا من المواد البترولية.
النهاردة مصر احتفلت بعيد العمال بشكل مختلف ودا بحضور الرئيس السيسي واللي استعرض افتتاح عدد من القلاع الصناعية في السويس وفي كل أنحاء مصر عشان نعرف إن الصناعة هي الحل الأنسب والدائم والسحري لكل المشكلات الاقتصادية.. لأن الإنتاج يعني تصدير ويعني عملة صعبة كتير .. يعني استقرار في أسعار السلع.. يعني آمن غذائي واقتصادي قومي.. يعني تشغيل عمالة وتوفير فرص الانطلاق للشباب.. يعني مجتمع منتج.. ورفاهية في المستوى المعيشة... وعشان كل اللي قلناه دا مصر شغالة على خطط طموحة محصلتش في تاريخها للنهوض بالصناعة المصرية وإعادة احياء القلاع الصناعية القديمة وتوطين الصناعات المتطورة وجذب المزيد من الاستثمارات الضخمة للقطاع دا..
الحكومة نجحت في حل أزمات كتير جدا في الملف دا وقدرت تعدل التشريعات وتقضي على الروتين اللي كان بيطفش رجال الصناعة ودلوقتي تقدر تاخد رخصة المصنع في ساعتين... ودا غير حل مشكلة آلاف المصانع المتوقفة أو المتعثرة لأسباب كتير.. وحصلت الانطلاقة في الصناعة ودا اللي بنشوفه كل يوم من مشروعات كبيرة وعملاقة وبارقام اول مرة نسمع عنها.. كل دا عشان مصر تتحول لمركز إقليمي للصناعة والتجارة وخاصة أنها عندها امكانيات القوة الاقتصادية الشاملة زي قناة السويس والموانئ والموقع الجغرافي ووجودها وسط شبكة خطوط التجارة العالمية وقربها من الأسواق.. يعني اللي جاي نهضة جديدة هتكون تاريخية في كل قطاعات الاقتصاد ومنها الصناعة.. ومصر زي ماقالت التوقعات إن مصر هتكون من ضمن أفضل واقوى الاقتصادات في المنطقة والعالم..
وعلي صعيد المشروعات فيه خبر مهم جدا محدش خد باله منه رغم أنه بيمثل نقلة نوعية لكل صعيد مصر.. والخبر بيقول إن شركة اسيوط الوطنية لتصنيع البترول (أنوبك) الحكومية بتستعد دلوقتي لبدء التشغيل التجريبي لمجمع التكسير الهيدروجيني للمازوت في أسيوط خلال الربع الأخير من 2026، بحسب تصريحات صحفية لمسؤول حكومي.
المشروع حضرتك بيهدف إلى إنتاج 2.5 مليون طن من السولار و400 ألف طن من النافتا ... و100 ألف طن من البوتاجاز وكمان انتاج 300 ألف طن من الفحم بخلاف 66 ألف طن من الكبريت سنوياً .. طبعاً شفتوا الأرقام الضخمة للانتاج.. بس اللي متعرفهوش حضرتك أن المشروع من ضخامته هيغطي احتياجات صعيد مصر من الوقود وهيساهم في تقليص واردات مصر من المواد البترولية كل سنة وتوفير مليارات الدولارات كل سنة..
الأهم أن المجمع هيحول المازوت منخفض القيمة والناتج من شركة أسيوط لتكرير البترول المصرية إلى منتجات بترولية عالية القيمة وفق المعايير البيئية العالمية وبيشمل المشروع 5 وحدات رئيسية بتضم وحدة لإنتاج الهيدروجين، ووحدة تانية لاستخلاص الكبريت إلى جانب وحدات للمعالجة الهيدروجينية والتكسير الهيدروجيني مدعومة ب8 وحدات مساندة... وبلغت نسبة الإنجاز في المشروع 82% بنهاية مارس اللي فات..
وعشان نعرف قد أيه المشروع ضخم كفاية نعرف ان الكلفة الاستثمارية للمشروع قفزت إلى 3.1 مليار دولار، مقارنة بـ2.8 مليار دولار كانت مستهدفة في سنة 2022 بسبب تقلبات سعر الصرف وارتفاع تكاليف المكونات المستوردة، ويُشكل المكون المحلي نحو 40% من إجمالي التكلفة.
ومن اسيوط هنروح للساحل الشمالي وحكاية مشروع ضخم بيتعمل هناك في نفس قطاع البترول وهو مشروع مجمع البحر المتوسط للبتروكيماويات في العلمين الجديدة باستثمارات 7 مليار دولار واللي بتنفذه شركة شارد كابيتال الإنجليزية.
المجمع الجديد بيعتبر من المشروعات الكبرى اللي بتتمتع بإمكانيات ضخمة وقدرة على تحقيق مردود اقتصادي متميز لمصر والمنطقة عن طريق تعظيم الإنتاج والتصدير من المنتجات البتروكيماوية عالية القيمة وتعظيم القيمة المضافة من موارد مصر لإنتاج منتجات بتروكيماوية متميزة للإسهام في تحقيق مردود متميز للاقتصاد المصري من خلال تعظيم الانتاج والتصدير لتحقيق عائد دولاري وتوفير مدخلات الإنتاج للصناعة...
كل دا كان مجرد أمثلة لمشروعات هتغير شكل الاقتصاد المصري في الفترة الجاية وبياكد إن الصناعة هي المستقبل.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
