طالب الإعلامي مصطفى بكري بالتحقيق في أزمة البنزين المغشوش والذي شكى عدد من المواطنين من وجوده في بعض المحطات وتسبب في تلف لسياراتهم.
وقال “بكري” خلال برنامج "حقائق واسرار" المذاع على قناة "صدى البلد": "مشكلة البنزين المغشوش كل شوية تسمع حد يقولك العربية وقفت غير بقي طلمبات البنزين عايزلك 30-40 ألف جنيه قلق عند الناس تدخل بنزينة مش عارف هتخده مغشوش والا كويس".
وأضاف: "إيه الموضوع؟ هو ده لعبة واحد ولا حاجة تلقائية؟ لا دي عصابة منظمة وحطت لنا بنزين مغشوش لازم نبقى عارفين ايه اللي حصل؟ وأتمنى بالفعل مجلس الوزراء والسيد المهندس دكتور كريم بدوي يطلع بيان وهو راجل محترم وشغال شغل كويس يطلع بيان يقولنا فيه حصل ايه مين المافيا اللي عملت ده".
وتابع: "بتاخد البنزين تلاقي الماية عليه والعربيات تقف في الشوارع بسبب هذا الموضوع، ياجماعة دا أمن بلد ازاي؟ ازاي بيحصل ده ومنين البنزين ده؟ مين اللي وراه ومين اللي تآمر ومحدش يقنعني أن الموضوع ده مفيهوش لعبة لا فيه لعبة ولعبة كبيرة ولصالح ناس".
وواصل: "اللي بيحط ماية ده بدل البنزين ويخلطه بشوية بنزين ويبعه لا دا شخص مش عادي الموضوع مش سهل عشان كده احنا محتاجين بيان وفي أسرع وقت البيوت كلها خايفة وكل اللي معاه عربية خايف دلوقت وقولولنا ايه بيحصل في البلد".
واختتم: "اللي عمل ده عايز اعدام اقسم بالله لو في تشكيل عصابي يحاكم محكمة عسكرية ويعدموا أنت بتعمل ضرر وقلق وفوضى في المجتمع بهذا الذي حدث واحنا مستنين بيان السيد رئيس الوزراء والسيد وزير البترول ونتمنى أن هذه القضية تفتح في البرلمان ويجيوا ويتكلموا لأن دي مصلحة بلد واختراق في ناس دخلت وغشت البنزين عايزين نعرف دول مين ويتحاكموا سريعا".
